Xəlil Rza Ulutürkün doğum günü ilə bağlı tədbir keçirilmişdir

Oktyabrın 21-də azadlıq mücahidi, Azərbaycan poeziyasının görkəmli nümayəndəsi, Xalq şairi, filologiya elmləri doktoru, professor Xəlil Rza Ulutürkün anadan olmasının 83-cü ildönümü münasibətilə X.R.Ulutürk və onun oğlu, Azərbaycanın Milli Qəhrəmanı Təbriz Xəlilbəylinin xatirəsinə ucaldılmış abidə önündə tədbir keçirilmişdir.
Tədbir iştirakçıları abidənin önünə tər gül-çiçək dəstələri düzmüşlər.
Tədbirdə rayon mədəniyyət və turizm şöbəsinin inspektoru Lətif Zərbəliyevin giriş sözündən sonra çıxış edənlər «Kürün töhfəsi» ədəbi birliyini sədri, Azərbaycan Yazıçılar Birliyinin üzvü Nəbi İbrahimov, Salyan şəhər 3 saylı tam orta məktəbin müəllimi Günel Orucova bildirmişlər ki, istiqlal şairi X.R.Ulutürk 1932-ci il oktyabrın 21-də Salyan rayonunun Pirəbbə kəndində dünyaya göz açıb. 1949-cu ildə Salyan şəhər 2 saylı orta məktəbi bitirib. Elə həmin il Azərbaycan Dövlət Universitetinin filologiya fakültəsinin jurnalistika şöbəsinə daxil olub. Moskvada M.Qorki adına Dünya Ədəbiyyatı İnstitutunun məzunu olub. «Kitab» adlanan ilk şeiri «Azərbaycan pionerii» qəzetində işıq üzü görüb. «Bahar» adlı ilk şeirlər kitabı 1954-cü ildə çap olunub. Natiqlər qeyd etmişlər ki, X.R.Ulutürk ciddi, sanballı poeziya nümunələri yaratmaqla yanaşı, tərcümə sahəsində də qələmini uğurla sınamış, ədəbiyyatşünaslıq elminin inkişafına layiqli töhfələr vermişdir. Onlar ulu öndər Heydər Əliyevin X.R.Ulutürkün  milli hisslərə, milli ruha köklənmiş poeziyasını, onun milli azadlıq hərəkatındakı rolunu yüksək dəyərləndirdiyini vurğulamış, möhtərəm Prezidentimiz İlham Əliyev tərəfindən şairin zəngin, çoxşaxəli irsinə daim diqqət və qayğı göstərildiyini qeyd etmişlər. Şair-jurnalist Əzizağa Məmmədli X.R.Ulutürkün xatirəsinə həsr etdiyi şeirini söyləmişdir.
Salyan Dövlət Kukla Teatrının baş rejissoru Rafiq Mirzə qüdrətli şairin poeziya nümunələrindən birini söyləmiş, şagirdlərin ifasında X.R.Ulutürkə həsr olunmuş şeirlərdən parçalar səsləndirilmişdir.
Şarin bacısı Ulduz Xəlilbəyli şairin ailəsi adından çıxış edərək tədbirin keçirilməsi ilə əlaqədar rayon İcra hakimiyyətinə öz minnətdarlığını bildirmişdir.