Rayon İcra Hakimiyyəti başçısının Qarabağlı kəndində səyyar görüşü

30 sentyabr 2014-cü il tarixdə rayon İcra hakimiyyəti başçısı Tahir Kərimov rayonun Qarabağlı kəndində vətəndaşlarla səyyar görüş-qəbul keçirmişdir. Görüşdə RİH başçısı yanında şuranın üzvləri, hüquq-mühafizə orqanlarının rəhbərləri, idarə, müəssisə və təşkilatların rəhbərləri iştirak etmişlər.
Səyyar görüşdə çıxış edən RİH başçısı Tahir Kərimov Regionların sosial-iqtisadi inkişafına dair Dövlət Proqramları çərçivəsində respublikamızın digər yerlərində olduğu kimi, Salyan rayonunda da aparılan genişmiqyaslı quruculuq-abadlıq işlərindən danışmış, rayonumuzun ictimai-siyasi, mədəni həyatında baş verən yeniliklər barədə məlumat vermişdir.
Canlı diskussiya və vətəndaş fəallığı ilə seçilən səyyar görüşdə kənd sakinlərini düşündürən məsələlər dinlənilmiş və onların həlli barədə müvafiq qərarlar qəbul edilmişdir. Belə ki, sakinlərdən Rahil Hüseynov, Şəhla Ağayeva, Vüqar Qafarov, Maral Orucova, Rəftar Nuriyev və başqaları səyyar görüşün təşkilinə görə RİH başçısına təşəkkür və minnətdarlıqlarını bildirmiş, onları narahat edən məsələlər barədə fikirlərini söyləmişlər. Vətəndaşlar yeni tikilmiş evlərə qaz və elektrik xətlərinin çəkilməsi, kənd məktəbi üçün əlavə yardımçı otaqların tikilməsi, Şirvan-Salyan avtomobil yolunun, həmçinin kəndarası yolların təmiri barədə məsələ qaldırmışlar. Vətəndaş Sürəyya Kərimova kənddə avtoyuma məntəqəsinin tikintisi üçün sənədlərin hazırlanmasına köməklik barədə xahiş etmişdir.
Qaldırılan hər məsələ RİH başçısı T.Kərimov tərəfindən  diqqətlə dinlənilmiş və onların həlli üçün aidiyyati orqanlara müvafiq tapşırıqlar verilmişdir.