26 oktyabr 2021-ci il tarixində şəhər 2 saylı tam orta məktəbində Rayon İcra Hakimiyyətinin və Təhsil şöbəsinin birgə təşkilatçılığı ilə Vətən müharibəsi Qəhrəmanı və müharibə iştirakçıları ilə məktəblilərin görüşü keçirilmişdir.
Salyan rayonunda “Qəhrəmanlarımızı tanıyaq” adlı silsilə tədbirlərə start verilmişdir. 26 oktyabr 2021-ci il tarixdə şəhər 2 saylı tam orta məktəbində Rayon İcra Hakimiyyətinin və Təhsil şöbəsinin birgə təşkilatçılığı ilə Vətən müharibəsi Qəhrəmanı və müharibə iştirakçıları ilə məktəblilərin görüşü keçirilmişdir. Görüşdə “Vətən Müharibəsi Qəhrəmanı”, “Qarabağ” ordenli polkovnik-leytenant Qurbanov Səfər Qurban oğlu,“Cəbrayılın və Şuşanın azad edilməsinə görə” medalları və “Qüsursuz xidmətə görə” medalınhər 3 dərəcəsi üzrətəltif edilmiş mayor Qədirov Amil Şahalı oğlu, “Xocavəndin azad edilməsinə görə” və “Hərbi xidmətlərə görə” medalları ilə təltif edilmiş kapitan Abdullayev Faiq Savəddin oğlu, “Cəsur döyüşçü” və “Qubadlının azad edilməsinə görə” medalları ilə təltif edilmiş kapitan Orucov Vəfadar Gülpaşa oğlu, “Cəsur döyüşçü”, “Qubadlının və Füzulinin azad edilməsinə görə” medalları ilə təltif edilmiş kapitan Məlikov Fuad Azər oğlu və “Qubadlının və Cəbrayılın azad edilməsinə görə” medalları ilə təltif edilmiş baş-leytenant Rüstəmov Ülvi Səbahəddin oğlu iştirak etdilər. Tədbiri giriş sözü ilə açan rayon İcra hakimiyyəti başçısının müavini R.Cəbrayılov 44 günlük Vətən müharibəsində əsgər və zabitlərimizin igidliyindən, xalq-ordu birliyindən geniş söhbət açmış, qəhrəmanlarımızın tanıdılmasının vacibliyindən bəhs etmişdir. Natiq vurğulamışdır ki, neçə-neçə igid oğullar vətən uğrunda haqq savaşının iştirakçısı, şəhid və ya qazi oldular. Sonunda zəfər çaldığımız bu müharibə Azərbaycan xalqının vətənə necə bağlılığını, onun üçün gözünü qırpmadan canından keçməyə hazır olduğunu bir daha nümayiş etdirdi. Görüşdə iştirak edən müharibə iştirakçıları keçdikləri döyüş yolundan danışmış, məktəblilərin suallarını cavablandırmışlar. Məktəbin gənc şagird-rəssamları Qarabağ mövzusunda çəkdikləri rəsm əsərlərini qonaqlara hədiyyə etmişlər. Sonda məktəblilərlə müharibə iştirakçıları xatirə şəkli çəkdirmişlər.
